尼马大镬面临停赛７场
巴黎圣日耳门（PSG）法甲开咧遭遇2连败，上场对马赛更出现打斗事件。尼马声称受到种族歧视，向马赛后防艾华路苏比朗出手后食红牌。据法国传媒报道，尼马今次打人「断到正」，极可能重判停赛7场！
只想同艾华路苏比朗揽炒
尼马赛后不断狙击艾华路苏比朗，承认自己行为愚蠢之馀，亦要求同对方「揽炒」，佢喺社交网表示：「种族歧视係真实存在，但我哋唔能够容忍，我接受自己面临嘅处分，但同时亦希望罪魁祸首都一样受到惩罚，嗰个人（艾华路苏比朗）係蠢材，我中咗佢嘅计，所以我都係个蠢材。」无论如何，PSG今晚主场对梅斯嘅联赛，都会缺少尼马。
不过马赛就发出声明，指所有队友都可以证明艾华路苏比朗唔係种族主义者，更批评巴西传媒玩「起底」，公开艾华路苏比朗嘅私人电话，令佢受到滋扰同死亡恐吓。至于马赛中场皮耶仲过火，贴相将尼马个头P喺隻狗上面，摆明寸尼马係狗。
