新门将即签即用
今晚英联盃第3圈全英超对碰，李斯特城于主场硬撼阿仙奴。虽然两军今仗好大机会出副选，但生牯仔难得披甲必拚尽博上位，其中啱啱加盟「兵工厂」嘅后备龙门温拿臣，櫈都未坐暖随时要即刻上阵，双方近年碰头常大手交易，有望合演入球骚。
今仗绝对係第3圈最强戏码，咁啱两军头两轮联赛都赢晒，当然大家以副选列阵机会甚大，但都不能睇小，李斯特城中场占士麦迪臣已摆脱伤患困扰，经过头2轮联赛后备上阵，今仗可能担正热吓身先。
副选争上位必拚尽
至于阿仙奴方面，威廉沙列巴、祖尔韦洛克、雷斯尼尔逊等喺联赛冇机会落场嘅后生仔，相信今仗会被委以重任，连同日前联赛对韦斯咸奠定胜局嘅尼基迪亚，真係初生之犊不畏虎。
除此之外，阿仙奴寻日官方宣布签入迪安嘅冰岛门将温拿臣，据报转会费只係150万镑，呢位25岁冰岛国脚签约后已即时参加球队练习。阿仙奴惯例会用2号门将踢盃赛，随住达米安马天尼斯离队，温拿臣唔排除会即刻上阵，但佢初嚟甫到乜都未夹过，即遇上李斯特城，非常牙烟，加上近6次交手，有4次开3球或以上，估计今场会多波入。
