英格兰细顶比利时
卡尼归位都未必够砌
今晚欧国联A2组爆发上届世盃季军战，由英格兰主场恶斗比利时。虽然「三狮兵团」人才辈出，但点秤都未及比利时，就算今仗好大机会出番队长哈利卡尼等主力，但对住「欧洲红魔」都唔敢轻举妄动，何况近年碰头都係1球起、2球止，2.5球嘅入球细先係明智之选。
老实讲，英格兰近年确係冒起唔少新星，例如拉舒福特、查顿辛祖、谭美阿巴谦等，不过呢班生牯仔有唔少纪律问题，后两者与芝维尔因违反当地限聚令开生日派对，日前同威尔斯「拍跳」被雪藏，而菲尔科顿与格连活特喺上个月国际赛期更爆出「带女上房」事件，今次索性冇被徵召。虽然英格兰日前大胜威尔斯3比0，另一批新丁卡维特利云、布卡约沙卡、高亚迪等表现突出，不过同对手太弱有关，而且面对咁多负面新闻，主帅修夫基亦特登同队长哈利卡尼开会，倾吓点样改善内部纪律问题。查实英军喺头两轮欧国联，只得1胜1和，赢波嗰场係靠末段嘅12码先至险胜冰岛1比0，表现麻麻。
夏萨特缺阵攻力受损
以波论波，比利时整体实力仍喺「三狮兵团」之上，佢哋头两轮欧国联全胜，尤其係中前场有卢卡古、奇云迪布尼、泰利文斯等压阵，后备仲有巴舒亚伊、李安度杜沙特、卢克巴基奥等随时候命，不过队长夏萨特今次因伤落选，缺少呢位灵魂人物，「欧洲红魔」进攻点都差啲。英格兰都怯于对手强大火力，唔敢打得咁进取，近3次正面交锋，双方合共只製造4个入波，全开2球或以下，包括上届世盃分组赛及季军战，「欧洲红魔」都係小胜1比0及2比0，英格兰今仗必定先做好防守，2.5球嘅细盘值得捧场。
