车路士上盘放心捧
富咸领队柏加噩梦重临
周六英超焦点係「富林区打吡」，富咸于卡云农舍球场迎战车路士。车路士可谓富咸领队柏加嘅噩梦，无论球员生涯同执教生涯都如是，而且车路士一向剋住富咸，近5次交手取得全胜，加上富咸周中突加开快车，匆匆再战体力消耗大，让球盘车路士让一球，放心捧上盘。
柏加球员生涯喺2004年头至2005年6月短暂效力车路士，但当年中场人才济济，包括今场对手领队林柏特，柏加得唔到重用，好快被卖走咗去纽卡素。辗转多年后柏加2013年转投富咸，当年富咸英超两循环都输畀车路士，两场柏加都正选上阵，最终富咸要降落英冠。
到咗2019年2月尾柏加获委任做富咸领队，第一场正式执教嘅赛事，咁桥又係斗车路士，可惜继续畀车仔剋住，结果主场输1比2。柏加喺「富咸对车路士」呢个组合唯一嘅胜仗，係佢喺2004年11月仲踢紧车仔，联赛盃上阵作客富咸赢2比1，但入致胜球嗰个，係后备上阵嘅林柏特，嗰场波渡边年咁啱喺伦敦公干入场睇，场飞尾仲Keep到依家。
讲咁多旧史，其实只係想讲，「蓝战士」一向係西伦敦富林区老大，多年来都剋住富咸，柏加更无可能凭一己之力改变呢个残酷现实，双方近18次联赛交手富咸从未赢过，而最近5次对碰车仔全胜，当中更有4次赢2球或以上，实力分野明显。
赛期改动富咸未回气
最大镬係，英超赛程受到疫情影响，原定周中阿士东维拉主场对热刺改期，赛期突然由富咸顶上，变成作客热刺，其实佢哋上周英足盃先同昆士柏流浪激战120分钟晋级，周中突然加插一场联赛，到今场再斗车路士，体力肯定未能赶及恢复，车路士坐收渔人之利，上盘稳开。
