巴塞争盃细危
毕尔包新帅有料到
今晚喺塞维利亚举行嘅西超盃决赛，由巴塞隆拿激斗毕尔包。虽然月头交手巴塞赢波，但都係靠美斯单天保至尊，呢位队长唔够弗，对进攻影响甚大，毕尔包上仗能够淘汰皇马，证明新帅马些连奴有料到，佢哋近年碰头都係一球起、两球止，决赛场合随时更加保守，中位数2.5球嘅细盘有分头，值得捧场。
巴塞踏入2021年，联赛3连胜仲要全部喺客场，美斯入4粒兼交出1次助攻，绝对係极速反弹嘅关键。不过呢位队长大腿有伤，错过日前西超盃4强对皇家苏斯达嘅赛事，巴塞嘅火力即刻弱咗，尤其係之前略有起色嘅基沙文，难得做主角却频频失机，去到互射12码仲宴客添，若非钢门达史特根勇救险球，法定时间未必顶得住1比1，更遑论靠互射12码晋级。一句讲晒，巴塞冇美斯，进攻走晒样，就算佢今场顶硬上，赶及复出亦未必够弗，唔好睇得巴塞咁高。
过分倚赖美斯数胡
另边厢，毕尔包新一年搵咗马些连奴接手，呢位西甲老江湖经验丰富，虽然首仗就喺联赛输畀巴塞2比3，但嗰场唔係美斯省两粒亦未必输，跟住上仗就係西超盃4强对皇马，凭老将鲁尔加西亚梅开二度，以2比1勇挫上届盟主「银河舰队」，认真唔讲得笑。
马些连奴之前执教华伦西亚，就喺2019年西盃决赛击败巴塞，协助「蝙蝠兵团」事隔11年再捧西盃，绝非泛泛之辈。翻查纪录，双方近8次交手，有7次开2球或以下，加上决赛场合难免踢得小心谨慎，捧入球细最划算。
