双红会利物浦降魔

全球6亿人引颈以待

2021年最瞩目对决，英超「双红会」今晚上演，利物浦于主场硬撼死敌曼联。今场係2008/09年度球季后，双方再次以争标劲敌身份碰头，事关重大，红军「晏菲路威力」向来非常强劲，近8场联赛主场赢7场，而红魔鬼上次联赛作客输波，正正係造访晏菲路球场，再度造访凶地难逃厄运，红军小让平半，上盘抵玩到极。

英国传媒估计，全球将会有近6亿人收看呢场直播，即係每13个人就有一个会睇，即使冇现场观众，大战气氛一样浓烈，两军上下都非常重视。今场波嘅重要性，唔单止係3分，或者争标形势，仲係利物浦唔想畀曼联喺顶级联赛冠军抛离嘅重要一仗。

上季红军首夺英超锦标，累积第19个顶级联赛冠军，只差曼联1个，今季如果成功衞冕，就可以追到同红魔鬼平头，所以今场主场出击，一定以全取3分为目标，和都不能接受。

晏菲路威力非同小可

原本走势不俗嘅利物浦，近3场联赛竟然只得2和1负，令死敌曼联有机可乘，吸取教训后，今场「争冠6分波」更加不容再失。事实上，利物浦自上周英足盃大胜维拉后，足足有一个星期时间休息，与上周中仍要喺联赛恶斗般尼嘅「红魔」相比，可谓以逸待劳。

红军嘅「晏菲路威力」强劲，近67场联赛主场中，豪取55胜12和不败佳绩，包括今季8场联赛主场获7胜1和，加上今季作客特醒嘅曼联，上次联赛作客全失3分，咁桥就係上年一月造访「红军」淨吞两蛋，红军有心理优势。

曼联防线欠稳易出事

曼联近11场联赛取得9胜2和，唔经唔觉上咗榜首，老实讲过程真係有啲符碌，事实上佢哋真係唔算踢得好，渡边年身边好多红魔球迷朋友都有闹鬼球队表现，尤其係防线经常表现慌失失，上述11场联赛当中，有7场未能保持清白之身，共失11球。之前未对强队，成日作客失波反胜好似好醒，但红军「三叉戟」穆罕默德沙拿、罗拔图法明奴同沙迪奥文尼点会畀你停，入完你一球会再施压，一旦落后好难翻身，预料红军领队高普会採取最耍家嘅高压踢法对付红魔鬼，唔会畀曼联有任何机会，利物浦主场让平半，上盘抵玩。