双红会R2蓄细待发
争晋级踢得保守
今晚英足盃第4圈重头大战，曼联于主场火併死敌利物浦，亦係事隔一周后再演「双红会」Round 2。但与上周联赛唔同，喺英足盃难免会作出轮换，为面子大家都唔想输之下，一场过淘汰赛实踢得保守，加上红军陷入球荒，近年碰头都係1球起、2球止，2.5球嘅细盘乃明智之选。
双方上周末于晏菲路碰头互交白卷，「红魔」曼联得以保住榜首位置，不过联赛长路漫漫，孰胜孰负仍言之尚早。翻查佢哋过去5次喺英足盃交锋，曼联3胜2负稍佔上风；此外，除咗1996年于中立场温布莱球场举行嘅决赛以外，其馀4次交手均由主场一方胜出，往绩上似乎对主场出击嘅曼联有利，「红魔」近年对亲利物浦都会缩后打反击，预计今仗都会照办煮碗。
利物浦锋线死晒火
不过英超今季竞争超激烈，双方都係争标分子，嚟紧周中都要出战联赛，赛程咁频密，今仗或会收起部分主力，对实力点都有影响。而且利物浦近期头头碰着黑，近5仗中除咗上圈英足盃大胜维拉「青年军」4比1外，其馀4场不胜兼全部食白果，「埃及文明」锋线穆罕默德沙拿、沙迪奥文尼同罗拔图法明奴疲态毕露，迪亚高祖达仲养紧伤，奥历治神奇不再，对近年无坚不摧嘅「红军」嚟讲非常罕见，主帅高普仍未谂到计解决。
当然今仗係「双红会」，无论为争标定面子，大家都唔想输波失威，喺一场过嘅淘汰赛，难免会踢得稳打稳扎。翻查纪录，双方近4次正面交锋，合共只製造4个入波，其中「红魔」仅佔1粒，呢4场全开2球或以下，睇得出大家都踢得几保守，2.5球嘅入球细有2.02倍分头，值得捧场。
