曼城发围大有睇头
挟14连胜强袭史云斯
英超1哥曼城喺英格兰足总盃16强登场，作客英冠球队「天鹅」史云斯。曼城喺联赛带先，绝对有馀力应付英足盃，球队个势咁旺，领队哥迪奥拿当然唔想专登放鬆打窒强势，今场天鹅都当麻鹰咁打。史云斯亦录得10场不败，主场有力同「蓝月亮」对撼，双方近3次交手全开4球或以上，3.5球入球大玩得过。
曼城啱啱喺英超取得重要胜仗，作客4比1大炒上季冠军利物浦，亦係自2003年首次作客晏菲路赢波，联赛领先次席嘅曼联5分，仲要少踢1场，形势大好，佢哋连盃赛14连胜，绝对有力喺盃赛发围。
「蓝月亮」已杀入英联盃决赛，将与热刺会师温布莱争盃，嚟紧展开嘅欧联16强淘汰赛就会面对德甲球队慕逊加柏，今场英足盃虽然只对英冠仔史云斯，但预料嚟到季中重要阶段，经验老到嘅哥迪奥拿绝对唔会畀队波突然失准战绩向下，从而影响其他赛事夺标机会，所以今场阵容都会有番咁上下分量。事实上，曼城伤病问题唔算严重，除咗阿古路及奇云迪布尼之外，其馀位置都有足够顶替。
「天鹅」主场旺入波
史云斯现时喺英冠排第3，佢哋啱啱喺主场以2比0击败榜首嘅诺域治，同对方缩窄至2分距离，「天鹅」近10场不败，而且只有1场入唔到波，其中1月初由阿士东维拉借用嘅爱尔兰中场侯利汉尼脚风甚顺，近3场都有入波，加上加纳前锋安祖阿休，有力威胁曼城大门。两军上次碰头正喺前年英足盃8强，史云斯主场一度半场领先2比0，曼城下半场发力反胜3比2，连埋呢场在内，双方近3次交手全开4球或以上，求好分头博中位数3.5球入球大。
