边缘人抢缰车仔半Ｗ图利
今晚英足盃第5圈尾场，英冠仔班士利主场越级挑战车路士。车仔自杜曹中途接手后连场报捷，新帅效应唔讲得笑，最重要係佢一视同仁，个个都畀机会，难得遇上弱旅班士利，马高斯阿朗素、基奥特等「边缘人」必定抢缰博上位，半场客胜有买趁早。
之前陷于低潮嘅车仔，上月尾怒炒名宿林柏特，搵来德国籍教头杜曹接手，立即取得3胜1和，成功走出谷底。杜曹非常自我，之前执教缅恩斯、多蒙特及巴黎圣日耳门被炒，但都与战绩无关，而且佢「以态取人」嘅专业态度，颇受球员爱戴。杜曹上车后最大变化，係改打343阵式，而且尽量畀机会一众球员，无论「林伯契仔」谭美阿巴谦及美臣蒙特，抑或被「林伯」冷落嘅马高斯阿朗素、佐真奴费路、基奥特等，佢统统都试匀晒，希望搵到最啱呢个阵式嘅人选，同时亦激起众将斗心，一举两得。
虽然「德国孖宝」夏维斯及迪姆华拿，与堤亚高施华、基斯甸普列锡都有伤在身，但车仔胜在兵源充足。杜曹现时343阵式中以右翼衞冲击、左翼衞食胡嘅特点，与2016至2018年干地执教车仔嘅战术如出一辙，艾斯派古达、马高斯阿朗素等旧臣非常熟悉，因此立即入局，而赫臣奥杜尔无论打右翼定右翼衞都游刃有馀，令车仔进攻更具侵略性。
班士利近5仗仅1胜
班士利实力差几条街，喺英冠只排中游，近5仗赢得1场咁大把，赢嗰场係上圈英足盃、半力出击嘅诺域治，今仗只求输少当赢。相反，车仔一众「边缘人」都想趁机争取表现，斗心唔使怀疑，加上佢哋今季4场本土盃赛，全部于上半场取得领先优势，非常抢缰，半场客胜捧得过。
