屯兵后防迎战修咸顿 狼队牛年好细界
英足盃第5圈于大年初一凌晨上演英超球队对决，狼队主场出击迎战近况低迷嘅修咸顿，双方近期锋力都出现严重问题，想入波难度极高。狼队自从鲁尔占美尼斯重伤后，入球能力大幅下跌，近期成绩略有起色，全靠加强防守；作客嘅修咸顿经历连场大败后，喺一场过淘汰赛亦会先求稳守，今仗入球数字肯定偏少，2.5球嘅入球细值得捧场。
狼队今季喺英超跌至联赛榜下半部，最大原因係王牌前锋鲁尔占美尼斯重伤，虽然佢哋喺冬季转会窗，由皇家苏斯达引入箭头韦利安荷西，但呢位巴西前锋加盟后4仗仍未入过波，效果同鲁尔占美尼斯有好大差距。
为免继续沉沦，狼队近期刻意加强防守力，表现亦止跌回升，近5场录2胜2和1负，期间只失过2球，包括0比0闷和车路士同李斯特城两支劲旅。相信占美尼斯一日未复出，佢哋都要踢守势波保住英超席位。
南野拓实不合上阵资格
修咸顿早前喺联赛狂吞曼联9隻蛋，上场又以2比3不敌纽卡素，2场波加埋失12球，防线欠稳嘅问题相当明显。喺一场过嘅淘汰赛入面，修咸顿肯定会先以「止血」为首要任务，球队喺对上两圈都以零失球晋级，可见修咸顿係有能力专注防守，何况上场入波嘅日本新兵南野拓实，因为之前代表过利物浦踢英足盃，今场不合上阵资格，丹尼艾格斯又陷入球荒，修咸顿更加唔会轻率进攻。狼队过去3次主场对修咸顿，总入球全开2球或以下，今场捧细盘为明智之选。
