利物浦低迷入球细稳阵
英超利物浦主场迎战富咸，「红军」利物浦近3个月表现低迷，攻力亦大不如前，上周中英超快车0比1不敌劲旅车路士，球队史上首次录得联赛主场5连败，情况甚为恶劣。富咸自知实力唔及对手，今场应该会主守，考虑到富咸近8场联赛作客有7次总入球开2球或以下，可博中位数2.5球嘅入球细。
利物浦今季成绩大倒退，除咗因为防线伤兵满营之外，中前场球员表现亦令人失望，「埃及文明」锋线只有穆罕默德沙拿仍然保持高入球数字。不过，呢位埃及国脚上场对车仔，踢到62分钟就被换走，领队高普承认佢有疲态，担心佢受伤。穆罕默德沙拿今场可能都回唔切气。至于沙迪奥文尼、罗拔图法明奴脚风明显唔顺，其中沙迪奥文尼有一段时间养伤，仍然未恢复最佳状态。
此外，中场堤亚高艾简达拿被指踢法拖慢球队进攻节奏，亦令「红军」失去过往嘅凌厉反击，即使对包尾嘅锡菲联，亦仅赢2比0，主场更曾以0比1不敌另一支弱队白礼顿。更何况利物浦近6场联赛主场只入1球，唔好话要赢，连想入波都难。
富咸防线有料到
至于富咸虽然攻力弱，但防线甚为稳阵，近6场联赛只失2球，即使佢哋作客遇上强队，表现并唔失礼，包括仅以0比2不敌曼城，打和热刺1比1，甚至曾以2比0击败爱华顿。利物浦要攻入富咸大门并唔容易，博入球细更划算。
