打吡之夜双响炮

最激打吡战今晚打孖上！先有西甲首都打吡，马体会主场硬撼皇马，皇马一向係马德里「大佬」，但做惯「细佬」嘅马体会依家喺联赛领先，皇马能否后来居上，呢场「6分波」非常关键。之后有英超曼市打吡，榜首曼城主场火併2哥曼联，曼城各项赛事已21连胜，曼联梗係想打断死敌气势，无论为争标抑或为面子，两场打吡势必打甩髀。

曼市死敌闷战捱细界

英超曼市打吡，曼城主场迎战曼联。「蓝月亮」各项赛事21连胜，气势一时无两，「红魔鬼」识趣嘅，当然唔同佢硬碰斗攻，今场一于闷住同佢踢，搵机会先打反击，双方近4次交手都踢得好谨慎，全开2球或以下，包括联赛首循环喺奥脱福球场互交白卷，今场玩2.5球入球细好过。

打吡战一向唔可以简单用两军近况去预测，尤其喺首循环赛后，红魔名宿坚尼丧闹双方球员赛后揽头揽颈，毫无斗心，相信今场曼联球员会加多两钱肉紧。事实上，曼联周中同水晶宫互交白卷之后，虽仍续居英超次席，但已经落后曼城14分，今场梗係尽可能唔好畀曼城抛甩。

不过，曼城愈战愈勇，喺阿古路、奇云迪布尼及加比尔捷西斯轮流缺阵下，根度简、史达宁、菲尔科顿及马列斯都入到波，「蓝月亮」上场联赛4比1大胜狼队，造出21连胜，球员信心及士气均处巅峰。蓝月亮个势咁强，红魔更唔会硬碰硬，宁愿先做好防守，再搵机会打反击博一博。

红魔鬼欠锐焗打反击

曼联今季作客14战8胜6和，係欧洲5大联赛唯一保持作客不败嘅球队，作客利物浦、阿仙奴及车路士均踢成0比0，作客时显得更集中，累积近6次对Big 6全开2球或以下，其中5场互交白卷，反映佢哋有能力稳守同级球队，但同时亦冇料取得甜头，今场预料都係一场拉锯战，曼城未必可以予取予携，咁易延续胜仗，倒不如转个玩法，捧2.5球入球细好过。

马体会守细波迎「舰队」

今晚西甲上演首都打吡，1哥马体会主场迎战3哥皇马。马体会依家打少场兼领先5分，今仗难免会踢得保守啲，皇马箭头宾施马状态未弗，而且近期攻力麻麻，两军近年联赛碰头经常少交收，2.5球入球细乃明智之选。

马体会上场联赛以2比0击败维拉利尔，终止之前3场不胜颓势，前锋苏亚雷斯赛前已扬言希望报番首循环一箭之仇，睇番马体会依家联赛累积58分，未计今轮赛事，领先打多1场嘅巴塞及皇马5分，佢哋向来以防守硬淨见称，今季只失16粒，失球之少冠绝西甲，何况有领先优势，梗係你急佢唔急，甚至打和都冇坏，最紧要唔好畀皇马赢波，今场定必稳中求胜。

皇马宾施马刚伤愈未弗

另一边厢，「银河舰队」上场玩嘢玩出祸，中途突然变阵改踢3人防线，但因左翼衞费兰特文迪压得太前，回防唔切导致失守，最终只能逼和皇家苏斯达1比1，痛失2分，赛后主帅施丹亦坦言变阵失败，预计今场唔敢乱嚟。皇马今季只有宾施马入波达双位数，极倚赖佢数胡，呢名箭头啱啱伤愈，不过即使赶及今仗复出，亦唔慌有十足状态。

翻查纪录，两军近8次于联赛上演嘅首都打吡，7次开2球或以下，可见每次碰头，战情都紧凑有馀入波唔多，今场更关乎皇马能否成功衞冕嘅「6分波」，相信会踢得特别谨慎，睇准机会先进攻，不妨向2.5球嘅细盘埋手。