PSG学精大起巴塞
受过教训唔敢保守
今晚续演两场欧联16强次回合大战，法甲豪门巴黎圣日耳门（PSG）主场再斗巴塞隆拿。巴塞首回合落后1比4，今仗冇得拣焗抢攻；PSG于欧联经历多次被「翻盘」惨痛教训，相信亦唔会踢得过分保守，既然两军近7次欧联交手一共合力炮製31个入波，6次总入球开4球或以上，中位数3.5球照捧大。
巴塞首回合主场落后1比4，想晋级今仗至少要入4球先有价讲，记得两军喺2016/17球季欧联16强碰头，巴塞当时喺首回合落后0比4，次回合返主场上演绝地大反击，喺失咗1个作客入球情况下，仍凭补时阶段入波大胜6比1，总比数赢6比5晋级，成为欧联反胜经典之一。虽然今次两军主、客身份互调，巴塞要反胜难度更高，不过佢哋喺西甲作客已经8连胜，而且上周中西盃4强次回合对西维尔，巴塞亦喺首回合输0比2嘅劣势下，成功收复失地，踢至加时以总比数3比2赢波杀入决赛，以王牌美斯近16场轰入14球嘅「托弗」状态，要取得入球带领巴塞作客赢波绝非冇可能。
近7次交锋炮製31球
PSG现时形势大好，不过除上述一次被巴塞淘汰外，PSG喺2018/19球季16强对曼联，同样试过喺首回合作客胜2比0嘅优势下，次回合返主场输1比3出局，正所谓前车可鑑，相信佢哋唔敢放软手脚。何况PSG踢法一向主攻，上场法足盃作客大胜比斯特3比0，基利安麦巴比又入两粒做功臣，早前受伤嘅迪马利亚亦后备上阵，今仗可以候命，虽然尼马因伤继续缺阵，但PSG够晒料同巴塞对攻。两军过去7次于欧联交锋炮製31个入波，有6次开4球或以上，相信今次唔会例外，中位数调至3.5球照捧大。
