比利时白俄半场入球骚
欧洲区E组，比利时主场迎战白俄罗斯。「欧洲红魔」比利时攻力强横，射手卢卡古脚风顺，连续两场分组赛均取得入球，为争出线，主场出击不容有失，但佢哋后防集中力不足，近7场有6场有失波，当中5次半场开2球或以上，遇正踢法开放嘅白俄罗斯，肯定一开波就狂攻，1.5球半场大绝对玩得过。
「欧洲红魔」先以3比1击败威尔斯，再1比1逼和捷克，前锋卢卡古两仗都有入波，不过，值得留意嘅係，比利时虽然保持不败，但两场都係先失波嗰队，球队防线集中力不足。后防重心华美伦及维顿汉均年过34，不论配搭里昂中坚积臣丹拿雅抑或係热刺嘅艾达韦列特，都未能替比利时保住清白身。比利时近7场只有1场可以保持不失，而且好多时上半场已经失守，呢7仗就有5次半场开出总入球2球或以上。
白俄罗斯上仗大胜爱沙尼亚4比2，效力莫斯科火车头嘅前锋利沙高域治梅开二度。白俄罗斯踢法开放，入得又失得，娱乐性十足，近5场赛事，上半场同对手合共炮製14个入波，全部半场开2球或以上，今场遇着攻力强横嘅比利时，站在睇波角度一定正，至于投注就可以拣1.5球半场大。
捷克团战反咬威尔斯
同组另一场，威尔斯在上周中首轮反输畀比利时，防守唔多稳阵，单靠「大圣爷」加里夫巴利恶唔出样；捷克近4仗取得3胜1和，包括上仗打和比利时，整体表现唔差，今仗可望反客为主，客胜要得过。
