西班牙中立场係福地 车路士踩油明恰波图
另一场8强首回合，波图同车路士喺西班牙塞维利亚展开恶斗。波图今场除咗冇咗主场之利，首、次席射手沙治奥奥利华拉同达利美都要停赛，而且近5次斗车仔输4次，形势都几恶劣，车路士今季目标放在欧联，佢哋近7场欧联获6胜，上场联赛输畀西布朗嗰场可以抹咗去，放心捧车仔客W。
由于新冠肺炎疫情严重，加上各国入境限制问题，车路士对波图两回合赛事都安排喺西维尔主场比斯祖安球场举行，呢个安排绝对有利车仔，佢哋今届欧联分组赛同西维尔一组，作客就喺呢个球场大炒西维尔4比0，基奥特包办4个入波，比斯祖安球场绝对係车路士同基奥特福地。
奥利华拉达利美停赛
事实上波图于16强可以淘汰祖云达斯，好大程度上多得首回合凭主场之利赢波，现时要改踢中立场，变相失去一个重要优势。今场佢哋仲有两大神锋缺阵，首、次席射手沙治奥奥利华拉同达利美都要停赛，二人今季分别为波图各项比赛射入19及及15球，前者更喺欧联帮球队射入5球，係波图杀入8强功臣，波图冇咗佢哋等于自断双臂。
车路士踢少个下英超大败畀西布朗，但败绩不足为据，杜曹喺上场用迪姆华拿同领红牌嘅堤亚高施华，摆明係轮换做法，一早预咗欧联唔出佢两个，预料国际赛踢足3场、上仗只后备上阵嘅美臣蒙特，以及基奥特会正选上阵搏杀。波图自2017年前赢得欧联冠军后，从未进身4强，而且近5次斗车路士输4次，对赛往绩输蚀，加上车仔专注欧联，近7场欧联赢6场，强烈推介客胜。
