阿仙奴残阵难让锡菲联
今晚英超尾场，由包尾大幡锡菲联主场迎战阿仙奴。「兵工厂」唔单止伤兵满营，嚟紧周中仲要出战欧霸盃8强次回合生死战，预计今场或有所保留，况且阿仙奴联赛客场战绩向来不稳，锡菲联有望趁机偷鸡，主场受让之下，当然要捧让球主胜。
阿仙奴中后场爆发伤兵潮，包括刚完成手术嘅中坚大衞雷斯继续倦勤，左闸「拚命三郎」基兰泰亚尼证实左膝韧带受伤，需休养4至6周，仲有进攻中场马田奥迪加特早前喺国际赛期间触伤右足踝，领队阿迪达证实，呢位挪威国脚嘅伤势比预期严重，今场斗锡菲联肯定缺阵，令进攻组织大打折扣。
虽然格列沙加、伊美路维及布卡约沙卡及时伤愈，但未必立即上力。「兵工厂」刚于上周中欧霸盃8强首回合主场同布拉格斯拉维亚踢和1比1，嚟紧周中次回合重要性大于联赛，阿迪达随时避重就轻，今场收起部分主力。
主场出击唔失礼
至于锡菲联易帅后未见起色，近3场全败，但要留意3场都係作客，呢支包尾大幡近9次主场出击5胜4负，包括击败实力唔差嘅阿士东维拉，表现绝唔失礼，就算护级机会淼茫，主场比赛斗心未减。更重要係阿仙奴客场差劲，近5场联赛作客只得1胜2和2负，作客让波难靠，宁捧受让嘅锡菲联让球主胜。
