李城保前４明恰修咸顿
今轮英超率先上演修咸顿主场迎战李斯特城，双方实力同状态都有明显距离，「圣人」修咸顿遭逢3连败，士气低落。反观，李斯特城取得3连胜，包括早前喺英足盃4强击败修咸顿。加上李斯特城近3次联赛作客修咸顿，获得全胜，属于格食格，一于再追客胜。
「圣人」上岸战意成疑
修咸顿现时排15位，领先排尾3嘅富咸9分，兼踢少1场，基本上已经「上岸」，护级压力唔大。既然「圣人」冇抢分迫切性，球员未必会搏尽。事实上，修咸顿近况甚差，正值3连败，包括以0比3大败于护级球队西布朗脚下，最有指标性嘅比赛则係英足盃4强0比1不敌李斯特城，双方短期内再次交锋，预料战局相差唔大。
至于李斯特城仍然要为力保英超前4位而战，球员战意有保证，特别係前锋伊恩拿祖状态大勇，上场英超射入1球及1次助攻，协助球队以2比1反胜水晶宫。呢位尼日利亚国脚近4次上阵都取得入球，合共射入5球，脚风非常顺。加上仲有老牌射手占美华迪在阵，相信李斯特城要攻入修咸顿大门，并唔困难。值得一提，李斯特城上季英超曾经作客狂胜修咸顿9比0，今场有力再次反客为主，客胜值博。
