波兰哑火细盘有着洛
米利克退队罗拔佬孤掌难鸣
今晚「西瑞战」嘅前菜，就有同样属于欧国盃E组赛事，波兰喺中立场俄罗斯圣彼得堡，硬撼斯洛伐克。波兰今年先易帅，仲有米利克因伤退队，王牌罗拔利云度夫斯基势必成为众矢之的，更难争取士哥；斯洛伐克进攻一般，首仗都会稳打稳扎，加上近年碰头旺少交收，2.5球入球细捧得过。
虽然波兰一向靠罗拔利云度夫斯基单天保至尊，但由于佢目标太大，更多时会利用佢做掩护，畀队友后上数胡，好似上届欧国盃，就係靠「罗拔佬」引开对方后衞，令巴拉斯塞高斯基同米利克趁机偷鸡。查实呢位波兰队长实在太劲，一定畀对手重点看管，而队友普遍质素一般，令佢踢得坚辛苦，难怪近3届大赛入得两粒咁大把。何况波兰变动唔细，葡萄牙名宿保罗苏沙于今年先上任，接手后5仗赢得1仗，踢法上仍需磨合，而且米利克临开波前因伤退出，令「罗拔佬」孤掌难鸣。
斯洛伐克守强攻弱
斯洛伐克连续两届杀入欧国盃决赛周，上届更跻身淘汰赛，不过队长咸锡已33岁，近年只喺中超、瑞典超等联赛搵食，状态大不如前，进攻组织力大减。讲到阵中最孭到飞嘅球员，非史坚尼亚莫属，呢位中坚唔单只带领国际米兰重夺意甲冠军，佢亦係斯军防线定海神针，制空力强擅于盯人，逐渐成为领袖人物，难怪该队近8仗法定时间内，有6仗开2球或以下，明显守强攻弱。加上近3次交手，全开2球或以下，首轮唔输冇乜蚀底下，随时先求稳阵，入球细有计。
