靠铁壁铜牆搵食 瑞典半和克敌
周三凌晨欧国盃16强尾场，瑞典喺苏格兰中立场硬撼乌克兰。瑞典于今年仍未尝败绩，全靠固若金汤嘅防守，出战淘汰赛必定稳中求胜，乌克兰惊险杀入16强，今仗亦唔敢轻举妄动，双方近年碰头旺开半场和，不妨再追。
瑞典喺E组取得2胜1和，力压西班牙以首名出线，唔讲得笑。查实呢支北欧球队踏入2021年，喺各项赛事8仗未输过，当中只失3粒，其中6仗保持清白之身，喺射手伊巴谦莫域因伤无缘参赛下，能够自2004年后首度杀入欧国盃淘汰赛，证明巩固防线就係关键。
近4次交手全开半和
乌克兰喺C组只得1胜2负，所赢嘅只係弱旅北马其顿，成为其中1支最佳第3名仅仅出到线，非常惊险，主帅舒夫真高当务之急，一定係先调整防守，重新筑起喺欧国外8战只失4球嘅铜牆铁壁。虽然队长耶莫兰高与箭头耶梅卓克各入2粒，但过于倚赖两人数胡，其馀队友明显未够班，上仗以0比1输畀奥地利，畀对手全场压迫下，未能有效组织进攻。翻查纪录，两军近4次碰头，全开半场和，可见大家喺比赛初段都先求不败，今仗淘汰赛相信会更加保守，半场和值得追多铺。
