今晚奥运女足F组尾轮关键战，荷兰女足火并中国女足。「铿锵玫瑰」连场失分，为出线今仗一定要焗攻抢W，可惜防线弱不禁风，面对近3仗轰20粒嘅荷兰，压晒上前随时中门大开，实多波入，4.5球嘅入球大有买趁早。
中国喺今届首轮即惨吞巴西5蛋，次轮面对世界排名第104位、首仗对荷兰狂失10粒嘅弱旅赞比亚，本来系开斋良机，点知喺领先3比2情况下，竟一度反输3比4，好彩王霜末段操刀12码破网逼和4比4，个人食出大四喜，先至避免再输。中国两战只得1分，假如今仗赢唔到嘅话，出线真系冻过水，冇得谂咁多要豁出去抢攻，王霜脚风咁顺有入波本钱，可惜后卫李晴潼上仗做「红牌阿姑」，今仗要坐波监，令呢条两战狂失9粒嘅防线，弱上加弱。
「橙军」近3战共入20粒
「橙军」荷兰今届表现出色，首轮狂胜赞比亚10比3，次轮则逼和巴西女足3:3，连同之前国际赛大胜挪威7比0，3仗狂轰20粒，全开6球或以上，射手美迪玛已占咗当中8球，单计奥运已有6球进帐，排紧射手榜榜首，上仗更攻入「柏金式」靓波，信心爆晒棚。既然荷兰两战分组赛得4分，出线机会高唱入云，唔怕同中国斗攻，4.5球嘅大盘乃不二之选。
