东京奥运寻日闭幕，日本波随即接力，今日上演多场赛事，其中头场系日职北海道札幌冈萨多主场迎战浦和红钻。冈萨多近5场比赛仅1胜，状态低迷不宜高估。不过，作客嘅红钻亦唔好得几多，火力疲弱近3场仅入1球，双方都冇赢波把握，宁愿博中位数2.5球嘅入球细。
北海道札幌冈萨多踏入6月之后，表现走下坡，近5场比赛仅曾于主场以1比0小胜弱队德岛漩涡，而且系踢到88分钟，靠对手摆乌龙先至开纪录，绝对系「好波不如好运」嘅写照。上轮佢哋喺自己地头出击，迎战今季走晒样嘅大阪飞脚，唔只入唔到波，仲惨吞「双蛋」，以0比2落败，今场遇上防守稳阵嘅浦和红钻，恐怕更加难取得入球。
卡斯柏真卡突然「冇货卖」
另边厢，老牌球会浦和红钻近年已沦为中游分子，今季依然冇乜起色，喺季中佢哋引入挪超波杜基林特嘅射手卡斯柏真卡，但佢踢咗几场好波后，近排突然「冇货卖」，尽管连杯赛在内近5场取得3胜1和1负，惟总入球都系2球或以下，近3场更只有1球进帐。加上今场作客，预料浦和红钻会以稳阵行先，入球唔会多。
值得一提嘅系，红钻今年3月同冈萨多交锋，结果打和0比0，今场随时历史重演，入球细相当稳阵。
