今晚英超头场，「喜鹊」纽卡素主场硬撼「锤仔帮」韦斯咸。韦斯咸上季取得欧洲赛资格，但「连王」连格已经离队，不宜高估，而且近年对亲「喜鹊」例冇运行，作客让波捧唔落手，宁捧让球主胜。
韦斯咸上季后劲凌厉，以第6名过终点，并取得欧霸入场券，「莫天才」莫耶斯真系吐气扬眉，而佢最醒就系季中从曼联借入连格，「连王」半季上阵13场，就入9粒兼贡献3次助攻，绝对系「锤仔帮」重返欧洲赛嘅头号功臣，可惜佢高达10万镑周薪，韦斯咸实在负担唔到，惟有退番畀红魔，对佢哋影响不小。
「喜鹊」买断祖尔韦洛克
另一边厢，纽卡素啱啱正式签入祖尔韦洛克，呢位上季季中从阿仙奴借来嘅年轻中场，半季就入咗8粒，包括季尾连续7场英超有士哥，其中不乏多场后备入替于末段建奇功，系「喜鹊」最终成功护级嘅关键人物，加上佢冇伤兼夹惯夹熟，今仗随时可立即披甲。翻查纪录，双方近5次正面交锋，纽卡素取得4胜1和未输过，包括上季季尾主场险胜3比2，「洛克人」后备落场更攻入奠胜入波，摆明食住「锤仔帮」，主场有得受让咁笋，让球主胜有买趁早。
