英超上季盟主曼城展开卫冕之旅，首战作客伦敦球会热刺。两军就前锋哈利卡尼转会一事拉锯，不过，今场「蓝月亮」已经有英超暂时最高身价球员基亚利殊亮相，预料为球队带嚟新动力，而且曼城向来重视开咧战，近10季开咧战全胜，简单捧客W。
今场波花生味十足，相信赛前好多人都会谈论到，哈利卡尼转投曼城一事，呢名英格兰队长一心想他投，热刺留得住个人都留唔住佢个心，呢场肯定唔会上阵。热刺上季炒咗摩连奴，今季由新领队纽奴带领，正处于一个交接期，帅位都未坐暖，就要谂吓热刺成个战术及进攻体系嘅分配。
如无意外，热刺会由孙兴民踢正前锋，上季得唔到「寸王」重用嘅迪利阿里会复打正选领导中场线，虽然话热刺过去几季，都试过冇哈利卡尼，但佢近7季每季最少入17球，无影响就假嘅。
场外焦点系哈利卡尼，场内就肯定系以1亿镑天价由阿士东维拉转投曼城嘅基亚利殊，呢名英格兰中场将会披上10号战衣。基亚利殊喺中前场可以担任多个角色，而且侵略性强，唔怕带住个波一对一扭人，佢上季喺维拉被侵犯次数达110次，喺英超排名第1，比第2多22次，只要佢带进入危险地带，一系就畀佢造成威胁，一系就对手犯规，获得自由球，呢啲都令曼城今季又多一瓣杀着。
近10季开咧战全胜
今场曼城虽然有多名英格兰及巴西球员，因国际赛未及状态或带有轻伤缺阵，不过佢哋人强马壮，费伦托利斯系哥迪奥拿重点栽培嘅年轻球员，预料今季会顶替阿古路，担任正前锋位置，佢喺欧国杯为西班牙入过两球，见过大场面，今场大战当前唔会胆怯，加上曼城重视开咧战，近10年联赛首战全胜，客胜热得嚟又够稳阵。
