波图老将 比比
葡超今晚开波咪错过！
停摆多时嘅葡超，今晚终于重开，仲有榜首波图压轴出场，喺尾场作客法马利卡奥。波图依家只係领先「2哥」宾菲加1分，稍一不慎随时被过头，重开首击造访虚火已过嘅奇兵法马利卡奥，绝对唔会手软，直取让球客胜。
原本一直畀宾菲加骑住嘅波图，趁住对手喺停摆前5场联赛只得1胜下，从后赶上，以1分反压宾菲加升上榜首，目前掌握争标主动权，只要馀下赛程保持全胜即可捧盃，战意爆灯。睇番波图今季联赛作客成绩，除咗季初输畀基维辛迪外，近11场录得9胜2和佳绩，当中近4场赢晒之馀，有3场至少赢两粒，客场战绩仅次死对头宾菲加，位居葡超第2佳，等閒球队难阻佢哋。
事实上波图攻击力强劲，而且多点开花，阵中有14名球员于今季联赛都有入球进帐，当中前线组合法兰斯高苏亚里斯及马利加合共攻入13球，更可怕係波图后衞阿历士迪尼斯，呢位巴西守将至今已经有8个联赛入球。波图饿波一轮空群出击，相信法马利卡奥防不胜防。
法马利卡奥跌晒Watt
法马利卡奥虽然只係升班球队，不过季初表现一鸣惊人，头7仗取得6胜1和，更一度进佔联赛榜榜首位置，主场成绩亦相当不俗，联赛12战只曾3败，主场威力不容忽视。不过，呢类奇兵通常都打道气，踏入季中道气洩咗，兼且畀列强摸清实力底细，战绩随之下滑，停摆前8场联赛，赢得1场咁大把，依家跌到落第7位，而且葡超重开后闭门举行，法军失去主场球迷声势，加上首循环碰头惨吞3蛋，面对争标心切嘅波图，恐怕法马利卡奥凶多吉少，让球客胜咪错过。
