首尔难阻全北开上盘
前锋冇火花剂剂捱打
今日韩职「打吡星期六」，2支新败劲旅喺早场「T-ara打吡」相遇——FC首尔主场斗全北汽车。双方都力求反弹，不过首尔实力不及对手，而且搵边个喺前面拍朴主永都冇乜火花，加上佢哋主场面对全北全面捱打，近5次全部输晒，全北作客让半一，渡边年捧上盘。
FC首尔今季搵嚟4年前夺冠功臣卡路士阿祖安奴回巢，希望提升前线锋力，同时从全北汽车借用土炮中场韩承规。不过，后者则因借用条例，今场未能倒戈，今季卡路士阿祖安奴状态一般，大多数係后备身份上阵。被寄予厚望嘅「首尔Icon」朴主永，今季先后被安排伙拍过阿祖安奴、高尧韩同赵永旭，可惜全部都冇乜火花，朴主永4场正选上阵仍未开斋，脚风欠顺，其馀3人亦颗粒无收，今季首尔4个入波都唔关佢哋事，呢个就係佢哋开咧至今4战只入4球嘅症结所在。
急调名宿入教练组士气成疑
由于西班牙中场奥斯马巴巴养伤，塞尔维亚射手阿历山大比锡借用期将满未必披甲，首尔想变阵亦冇乜条件，只好考虑将赵永旭移入中场中，喺朴主永背后担任影子前锋，希望加强后上攻击偷鸡。但係攻击力之外，首尔嘅内部凝聚力都有问题，赛前急调青年军教头、刚退休两年嘅金珍圭入教练组，明显係想加强管理，令人遐想连篇，士气呢一样嘢肯定唔会係一时三刻解决得到。
全北上轮长达75分钟少打1人，作客以0比1不敌FC江原，虽然3连胜告终，但依旧排喺榜首，今场相信会打醒十二分精神，决心全取3分。事实上，全北今季拥有全韩职最强阵容，板櫈深度雄厚，即使后衞洪正好上场领红今场停赛，依然有金敏赫顶上，加上U22中场赵圭成刑满复出，对住实力次一班嘅首尔仍可看高一线。2018年起就未输过畀首尔嘅全北，近5次联赛作客首尔全部赢晒，其中4次赢2粒或以上，往绩反映实力差距，信全北今场可以迅速反弹，捧上盘。
