皇马咬包捱细界
冲冠关头见好就收
西甲剩馀5轮比赛，争标进入最后直路，皇家马德里、巴塞隆拿今晚分途出击俱遇硬仗，其中皇马会喺早场作客毕尔包。毕尔包表现向来够硬淨，以皇马复赛后经常见好即收演出，相信呢场会係一场交收有限嘅比赛，首选2.5球嘅入球细。
今场作客嘅皇马复赛勇不可挡，近6战全胜，并乘着巴塞近4场联赛3次失分，以4分优势反压对手于榜首带头，争标形势大好，但要留意「银河舰队」喺呢段频密赛程期间，主帅施丹往往只求3分，领先后经常歎慢板，所以皇马喺6场比赛入面加埋只入12球、失2球，近3场都开2球或以下，何况夏萨特仲足踝唔妥未必出得添。
毕尔包硬淨唔易啃
另边厢，毕尔包停摆期间有老将阿度里斯宣布退役，不过对呢支擅打整体战、以勇悍风格见称嘅球队冇太大影响，佢哋复赛后6场联赛只输1场，唯一败仗係作客鲁营球场仅负巴塞0比1，近4场联赛赢3场，状态可靠，而且佢哋主场出名难打，今季16场联赛主场取得9胜4和3负，强如巴塞隆拿、马德里体育会及维拉利尔作客都要失分而回，绝对唔易应付。
睇埋往绩，原来皇马近5次斗毕尔包只赢过1次，其馀4次打成平手，两队加埋只入咗7球，4次总入球开2球或以下，足证两军近年交手形势均非常接近，好难争取入波，捧入球细最好路。
