国米回勇嗒鱼腩
A山
今晚意甲尾场国际米兰作客史帕尔，国米争标机会唔大，但都想以亚军完成今季，战意有保证；榜尾嘅史帕尔近6仗5负曳到极，以国米豪华锋线，大炒唔难，捧让球客胜。
国米早前陷入小低潮，上场凭借将阿历斯山齐士（A山）交出两个助攻，及时反弹以3比1击败拖连奴。前锋拿达路马天尼斯亦射入1球，结束5场入球荒，有助提升信心，呢位阿根廷国脚盛传畀巴塞睇中，馀下赛事必加多几钱肉紧，配合已有20球进帐嘅卢卡古，同埋咸鱼翻生嘅「A山」，国米火力够晒保证。
史帕尔无药可救
榜尾史帕尔深受降班威胁，可惜碍于实力所限，想抢分都有心无力，佢哋复赛后毫无反弹良方，近6场录1和5负，其中近3场捧蛋之馀，全部淨负2球或以上，单计主场出击今年更係未赢过波，即使有地利亦无补于事，遇上来势汹汹嘅国米，整定要大败。
