西布朗主场打爆QPR
今晚係英冠煞科，全部12场会同时间开波，其中争升班关键战，2哥西布朗（图）主场对住昆士柏流浪（QPR）。西布朗今仗只要赢波，就毋须理会其他劲敌嘅赛果，取得直接升班资格，加上近年碰头食住QPR，让两球照捧让球主胜。
先讲争升班形势，除咗1哥列斯联已夺冠兼笃定升班外，另一直升位置仍悬而未决，第2嘅西布朗领先宾福特、富咸1及2分，较具优势，富咸仲要得失球输成条街，唔单止要望前面两队输波，今晚自己仲要大胜韦根，反超前机会唔大。相反，西布朗只要今仗击败QPR，就肯定以亚军过终点，与列斯联携手重返英超。虽然西布朗近期频频失分，但位处中游嘅QPR早就踢紧风流波，近8仗输咗5场，唔会阻人发达，加上双方近3次交手，西布朗唔单止赢晒，更加狂轰12粒，为咗重返英超呢个「金矿」必定搏尽，让球主胜有计。
宾福特炒起班士利
至于3哥宾福特主场迎战下游分子班士利，由于西布朗上轮失分，若果宾福特上轮赢史笃城就可杀上次席，可惜佢哋唔争气输0比1，联赛8连胜断缆，兼且将主动权拱手让出，坚唔抵。不过宾福特今季主场特醒，22次联赛主场出击，豪取14胜5和3负，暂与列斯联、富咸并列主场成绩最佳球队，主场威力唔讲得笑，遇上弱旅班士利会力求大胜，总之做好本分，再望奇迹出现，让球主胜好路。
