全北首尔增援大打出手
韩职周日直播大战，有衞冕嘅全北汽车主场迎战ＦＣ首尔，两大名牌近期成绩都唔多理想，亦赶喺转会窗关闭前积极增兵，成为市场焦点。全北有两大攻击强援加盟，今场有机会首演骚Quali，为追赶榜首肯定全力抢攻，首尔近期亦以进攻踢法求破低潮，博2.5球嘅入球大好路！
全北汽车近3场联赛2和1负，榜首位置送咗畀蔚山现代，41岁王牌前锋李东国嘅缺阵影响极大，呢点亦係全北面临嘅最大问题，不过佢哋亦对症下药，近期签入上季畀雷丁借去土超、27岁冈比亚翼锋莫度巴路，以及罗致哥连泰斯嘅巴西高大中锋古斯达禾轩历基，2位新援级数颇高，今场会先任后备待命，大大加强「绿军」进攻火力。
奇诚庸伤患未清难披甲
作客嘅ＦＣ首尔亦有瞩目增援，外流欧洲11年嘅中场奇诚庸强势回归，不过佢因为久疏战阵，伤患又未清，8月先会落场。首尔沉沦尾2，为打破颓势近期踢法亦偏向冒险，结果近3场联赛失咗8球波，今场佢哋仲有后防核心人物金南春停赛，「止血」难度更加高，唯一偷鸡机会就係以攻为守，前线会起用小将赵永旭拍朴主永攻坚加强活力，希望入波比失波多，开「大」盘机会极高。
